कोरियन पप गायिकाले नेपालमा स्कुल खोल्ने

विष्णु शर्मा
१५ फेव्रुअरी, २०१३

दक्षिण कोरियाली चर्चित पप गायिका बेइक जी योङले नेपालका बालबालिकालाई सघाउन विद्यालय खोल्ने भएकी छिन् । यसका लागि उनले आउँदो आइतबार राजधानी सियोलमा सातवर्ष पछिकै पहिलो कन्सर्ट आयोजना गर्दै छिन् । कन्सर्टबाट उठेको पैसाले विद्यालय खोल्ने छिन् । उनी कन्सर्टमा व्यस्त भैरहेको बेला नेपालमा बालबालिकाका लागि योङले स्कुल खोल्ने खबर बाहिर आएको हो । यो समाचार शुक्रबार ट्वीटरमा उत्कृष्ट समाचार बनेको छ । पपगीतसम्बन्धी वेभसाइट एलेकपपले यो समाचार पहिलोपटक लेखेको हो ।




कन्सर्टमा भाग लिने दर्शक र उनका फ्यानहरूले योङको यो अभियानमा डोनेसन गर्न सक्नेछन् । आर्थिक सहयोग गर्नेहरूलाई उनले सीडी र टिसर्ट बाँड्नेछिन् । संकलित पैसालाई विद्यालय खोल्न लगाइनेछ । नेपालको कुन स्थानमा स्कुल खोलिने हो बताइएको छैन । सन् १९९९ देखि चर्चामा आएकी योङ कोरियामा रुचाइन्छिन् । केपप, आरएन्डबी जस्ता जनरामा गीत गाउने उनी नेपाल आउने पनि जनाइएको छ ।