पारस यसकारण बाँच्नुपर्छ

विष्णु शर्मा
२३ फेव्रुअरी, २०१३

पारस शाहको स्वास्थ्य अवस्थालाई लिएर जसरी सामाजिक संजालका भित्ताहरू भरिए –यसले इन्टरनेट उपयोगिताको हाम्रो बेथितीलाई पुष्टि गर्छ । पुनः एकपटक ‘सामाजिक संजाल माध्यम मात्र हो, समाचार होइन’ भन्ने पछिल्लो बहसमा बल थपिदिएको छ । कुनैपनि व्यक्तिको स्वास्थ्यलाई लिएर यसरी व्यंग्य गर्नु र उनलाई अपमानको पराकाष्टामा पुर्‍याउनु गलत हो । प्रचण्डपुत्र प्रकाशले जिउँदै रहेको व्यक्तिलाई श्रद्धाञ्जली दिएर गलत प्रवृत्तिलाई मलजल गरेका छन् । भलै, पारस शाह सामन्तवादको केन्द्रविन्दु दरबारका एक पात्र होलान् तर भिन्न राजनीतिक परिवेशको यो छेकोमा उनलाई आम नागरिककै रुपमा लिइनुपर्छ । मेरै कतिपय मित्रहरूले पारसको मृत्युको हल्लामा स्टाटस लेखे र ट्वीटिए । तर, ती सबै खबरको विश्वसनिय स्रोत थिएन । हाँसो लाग्दो कुरो –स्रोतका रुपमा प्रकाश दाहालको नाम उल्लेख थियो ।

पारसको स्वास्थ्यलाभको कामना गर्नैपर्छ । यदि पारसको निधन हुने हो भने नेपालले दरबार हत्याकाण्डको ठूलो साक्षी गुमाउनेछ । देशले पारसबाट पाउने त्यो भन्दा ठूलो योगदान अन्य हुनेछैन । यदि उनी स्वास्थ्य लाभ गरि सामान्य अवस्थामा फर्किए भने सरकारले उनीबाट जेठ १९ को हत्याकाण्डको प्रमाण खोज्नुपर्छ । गोली चल्दा पारस दरबारभित्रै थिए र कतिपयलाई जोगाउने काममा उनको पनि भूमिका थियो भनिन्छ । यद्यपी, त्यो भूमिकालाई लिएर जनतामा शंकाको निवारण भैसकेको छैन । पारस तंग्रिए भने थाइल्यान्डस्थित नेपाली दुतावासले कुटनीतिक च्यानलमार्फत दरबार हत्याकाण्डको छानविन गर्नुपर्छ । राजतन्त्रको पतनका रुपमा पारसको भूमिका र कालखण्डलाई नेपाली इतिहासले कहिल्यै माफी दिनेछैन ।

पुनः पारसबारेको सोसल साइट खबरतिर फर्कौं –यतिबेला धेरै नेपालीको पहुँचमा इन्टरनेट पुगेको छ । लाखौं नेपालीले फेसबुक र ट्वीटरमा खाता खोलेका छन् । यसले पक्कै पनि समाचार कक्षमा चुनौति थपेको छ । समाचार कक्षले फेसबुक र ट्वीटरमा न्यूज आए भन्दैमा छाप्नु हुँदैन । ती तथ्यहरूलाई प्रशोसन गरि कम्युनिकेसनका सात तह पार गराउनुपर्छ । तब मात्र त्यसले समाचारको मान्यता पाउँछ ।